【棟析先機】排位大幅改善！「才子」係時候開糊（陳華棟）
蘋果日報 2019/12/31 22:25
排位改善開糊包裝才子陳華棟棟析先機
包裝才子型格上乘
阿棟口頭禪，一匹馬只可以賭三次，都唔贏就要割席！
早前就有匹「壽臣」，啱啱禮拜日跑完馬就多一匹「南莊瑞寶」，該仗全面性跑入三甲機會，點知都畀隻「為食格格」連追十幾個馬位搶埋個第三，而同場實力真係見晒底。
呢隻馬可以話「養自己就唔養老竇」，實力就唔係咁高，尤其跑草地更加唔使諗，但係跑泥地中距離都仲可以成日跑二至五名，養馬費唔會無嘅，但要贏馬就真係要有啲運先得。
明日（1月1日）第五場四班1400米，「正本開心」上季初出即勝，師傅教落，呢類馬渣極有個譜，但贏完之後演出反覆，可能嗰場係監生吞啦！
畀多啲時間佢，近況就開始好轉，尤其跑1400米仲係場場近。
上場郭能騎上去，直路斜跑先至輸，今次換上潘頓，一副不斬樓蘭誓不還嘅氣勢響度，畀多次機會佢，一定有回報。
第七場三級賽華商會挑戰盃1400米，「金鎗六十」呢類熱門馬，阿棟就好少推介，但睇佢今季不斷進步，締造犀利戰鬥力不斷提升，現時評102分，究竟仲有幾多上升空間？
阿棟部計數機都計唔到！總之今場初跑三級賽，孭輕磅遇呢批對手，贏多場絕對冇難度。
第十場三班1600米，「包裝才子」睇型格長相，到現時都未贏馬真係可惜。近仗表現已好，尤其上場若非排大外檔起步，被迫採取留前鬥後戰術，否則一早已經贏咗。
今勻排檔比上仗好得多，留放會更有彈性，狀態更進一步，係時候打開勝利之門。