【本報訊】股市呢排係咁升,無綫就食住條水,突然宣佈下個星期一(20日)午夜時段重播經典劇集《大時代》,係事隔18年再喺大氣電波上映,被視為股市升跌指標嘅「丁蟹效應」再次被熱烈討論。被問到擔唔擔心套劇一重播個市又跌?無綫企業傳訊部副總監曾醒明話:「其實鄭少秋喺《Sunday靚聲王》都出現咗一段時間啦,個市都長升長有呀!」
其實咪話唔驚,睇番秋官以往嘅紀錄,丁蟹效應真係唔講得笑,首先1992年秋官喺《大時代》飾演「丁蟹」一角就有劇情講股市,播映時就適逢香港股災,之後幾乎套套有佢份嘅劇一播就出事,股民唔擔心就假。