中秋佳節，噚日好多人都一家大小慶團圓，不過，部份尊貴議員就忙於出外考察，重兵分兩路㖭。
其中「西九一組」由四十五條關注組梁家傑帶隊，成員包括何鍾泰、吳靄儀、劉秀成同霍震霆，佢哋嘅目的地係西班牙畢爾包；而「滅貧一組」就由馮檢基帶隊到英國同南愛爾蘭，成員買少見少，只有李卓人、張超雄同長毛。
阿基同長毛提早啟程，阿人同社福界長毛張超雄就同家人過埋節食完飯先出發，搭十二點夜機。佢哋兩團人都係趁立法會放暑假出埠，點知撞正煲呔請晒佢哋六十人上珠三角，所以惟有一考察完就急急飛返香港歸隊，同煲呔一齊浩浩蕩蕩上廣州，做一場政治騷。
八方問長毛到時會唔會叫口號，長毛答得好妙，「如果佢哋聽我講，又如果冇記者，咪唔叫口號囉。」咁就叫內地班官忍耐吓佢啦，千祈咪趕走班記者。

長毛信唔過煲呔

由於二十五個泛民主派喺出發前只能就議程一事達成共識，所以到時各自表述，唔會有一份乜嘢立場書之類嘅嘢。長毛上次冇機會交封信同本書畀曾副主席，今次佢想拜託身為政治局委員嘅廣東省委書記張德江代轉。點解唔搵煲呔代勞呢？佢竟然話信佢唔過，同時費事難為佢喎。
長毛封信，離唔開要求北京平反六四，佢重同中共分析理論，話實行社會主義應該更民主，請曾副主席開放報禁、黨禁以及結束一黨專政，當然最重要係收回人大釋法。至於本書就重激，係托洛斯基寫嘅《被背叛的革命》，八方唔識啲咁深嘅嘢，長毛話簡單講，本書係寫蘇聯革命最後點解變成暴政喎，唔怪得共產黨咁驚佢。
長毛有長毛講，白鴿黨主席達仔上周五已經將封立場書交咗畀煲呔，請佢代轉交張德江，內容就提到07/08雙普選嘅要求，以及要釋放程翔同平反六四。達仔認為張書記係二十四個政治局委員之一，屬權力核心一部份，所以有機會就要向佢反映意見。
得大家咁睇得起，八方相信張書記只好硬住頭皮接信，但係政治嘅嘢，一定係中央話事，地方幹部邊有聲出，更何況你班友仔唔受廣東管，真係睬你就儍。過門都係客，廣東嘅官好識做嘅，中聯辦副主任李剛有言在先，話講乜都得，咁就好辦得多啦。
今次回鄉，各人都百感交集。阿人八九年六月八日後冇再踏足大陸，佢話冇心驚驚，只係冇得回國自由行，覺得仍有不足啫。

傳真︰2623-9278
電郵︰[email protected]