【新增回應】
台灣歌手潘瑋柏日前推出新專輯《illi 異類》，不過當中新歌《失眠》就疑似抄襲韓國男團Highlight成員龍俊亨嘅歌曲。

潘瑋柏嘅《失眠》公開後，有網民發現新歌嘅副歌旋律，跟龍俊亨於2014年喺綜藝節目《SHOWTIME》中公開嘅自創曲非常相似。另外，龍俊亨嘅歌曲中曾有「你不在的日子我就停止了呼吸」，而《失眠》中嘅歌詞亦有「無法呼吸breath breath breath」，令人覺得連歌詞及意境都非常相似。

據知《失眠》係由潘瑋柏跟房振剛共同創作，有網民認為房振剛「嫌疑」較大，因為佢過去曾因涉嫌抄襲而引起爭議。

Highlight所屬事務所表示：「該曲由MUSIC CUBE擁有出版權，因此必須跟MUSIC CUBE一齊商討呢個問題。目前我方正就抄襲一事進行確認，若該曲（《失眠》）確定為抄襲，有兩個可能對應嘅方法：向台灣方面要求將該曲正式下架，或正式要求支付著作權嘅相關費用。」

而潘瑋柏就於微博回應：「昨晚開開心心結束簽唱會，心情好的比平常早入眠，一起來..打開手機...我震驚了，我會理智的盡快了解查證此事，因為我也需要個答案。」

潘瑋柏所屬嘅華納音樂表示:「潘瑋柏早上得知這件事也感到非常錯愕與震驚！這首歌曲是跟房振剛分工詞曲創作，目前大家有疑慮的這4小節是出自於另一位創作者房振剛，華納音樂和潘瑋柏也正在了解查證中。」不過就未有回應韓方提出嘅「下架」、「付費」等處理方式。

隨後房振剛發表道歉聲明，表示因為好欣賞BEAST（Highlight前名），成日聽佢哋嘅歌，創作《失眠》時冇意識地創作雷同嘅旋律，對於造成大家困擾而非常抱歉，華納方面亦表示會將歌曲下架。