阿董條命夠苦,述職回港,即時要面對區議會廢除委任制嘅呼聲,跟住民陣又搞元旦大遊行,要求二○○七年普選特首。
胡溫喺北京,並無不准○七年普選特首,佢話對政治體制發展「高度關注」,政制發展「按《基本法》規定」,「從實際出發」,「循序漸進」,並「相信能夠形成廣泛共識」。
若然學足本地土共嗰副惡形相嘅嘴臉,胡溫一早就會話,所謂○七年普選特首,係「一小撮抗中亂港嘅壞分子陰謀」,係「同美帝反華勢力裏應外合」,目的就係將香港建設為「顛覆祖國的橋頭堡」。冇喎,因為胡溫重似番個人樣。胡溫若然咁講,冇錯,香港人○七年如果夠膽普選,就會出動解放軍,但同時,胡溫訪問美國,美國佬亦唔會同佢攬頭攬頸。
老毛、老鄧、陳雲,已經瓜晒柴,7.1自遊行嘅成果證明,正如阿溫話頭,六年成績,取之不易,全體香港人,要加倍珍惜。
咁即是話:○七年普選特首,絕對唔係冇得傾,只要向大陸佬說服到,冇違反《基本法》,同埋符合循序漸進精神。