喺香港禮拜六跑馬唔多，有時一個月有一次，有時甚至連嗰一次都冇亦唔出奇。而聽日戲肉就係樂聲盃，大家有冇發覺點解呢個盃成日都放喺禮拜六跑嘅？
原來英國殖民地時代，香港跑馬例牌每個星期三、六，所以嗰陣好多返寫字樓嘅朋友，中午收工就趕入場。嗰陣時英國佬認為星期日係屬於FamilyDay，故意俾番日一家大細聚吓！還記得嗰陣響中環同尖沙咀，有好多直去馬場嘅14座小巴，差唔多架架都坐爆。而樂聲盃贊助商蒙氏家族，向來重視FamilyDay，所以有傳聞話佢贊助呢個盃賽嗰陣，特別要求安排響星期六跑，睇番由97年回歸開始，16年以來只有兩次試過星期日跑樂聲盃，睇嚟呢個傳聞又確有幾分可信！