外牆牆磚跌落街隨時搞出人命！長實早年發展何文田豪宅半山壹號，有業主表示入伙短短11年外牆已狂甩磚30次！本報邀請資深驗樓師賴達明以紅外線掃描大廈外牆，結果檢查過程中已發現一塊約1呎長牆磚半空吊吊揈。

半山壹號最新平均實用呎價1.9萬元，戶戶過千呎動輒2,000萬元起跳，名人住戶包括王晶、陳浩民、李慧琼等，可謂「愛國大本營」。

記者收到業主投訴指大廈外牆牆磚鬆脆易剝落，遂邀請明哥實地檢查。他採用紅外線掃描大廈外牆，發現二期高層對出有3至4處牆磚出現異常高溫帶，相信外牆牆磚空鼓。明哥表示：「異常高溫帶即係話喺高溫熱力之下，如果係牆磚空鼓的話溫度會較高。」如果溫度正常紅外線掃描會顯示綠色，若出現異常高溫帶則顯示為紅色。

未測試完，記者已從二期高層對出外牆看到一處已剝落的位置尚未修補，更看到一塊約1呎長的牆磚在半空吊吊揈，稍為大風隨時跌落街！而牆磚吊吊揈的樓下是管理處職員經過的平台，一旦飛落街，後果不堪設想！

明哥指屋苑外牆採用厚磚，其實在保養維修上要特別留意：「因為個重量有返咁上下，加上日曬雨淋的話好容易會鬆脫開裂，事實上我哋留意到呢個外牆上，有好多位置都有牆磚剝落同鬆脫情況出現。」明哥建議屋苑應作詳細檢查。

入伙至今狂甩磚30次 業主：長遠驚影響樓價！

居住半山壹號約十年的業主周先生表示憤怒，他稱：「我哋買呢度嘅時候都好貴，幾千萬。嗰時大家都覺得呢度係何文田區最靚嘅樓，但出現呢個問題。我真係唔希望再有呢啲意外喺屋苑發生，同埋都會擔心長遠咁樣會影響樓價。」

起初入伙時外牆牆磚看似無大礙：「住咗幾年之後，就聽講開始有發現有啲外牆磚跌落嚟，跟住陸續每年都有幾次個案。最近嗰次就比較嚴重，我哋見到有人發相片見到成大塊外牆磚十幾件咁跌咗落嚟，聽講跌咗落架車上，我知道好似業委有同管理處溝通呢件事，但係始終都唔能夠完全解決到問題。」

以周先生所知，屋苑入伙至今已出現飛磚事件約30次，萬幸的是暫時未造成人命傷亡。惟周先生每次出門都膽戰心驚：「我都永遠都係行有蓋地方，唔會行出去。」

附近街坊經過，同樣心慌慌！記者向街坊邱先生展示牆磚在半空吊吊揈的照片，非常震驚：「死人架喎！冇理由喎，呢度成幾千萬，真係好危險，離譜啲喎。」經常路過半山壹號的他表示，日後會行出對面小路以免「中頭獎」。

外牆飛磚不幸扑死人責任誰屬？律師：告業主立案法團　

外牆飛磚不幸扑死人或導致財物損失，到底責任誰屬？律師黃國桐表示：「除非寫得好清楚外牆係由大業主保留，但呢種情況通常只會喺舊式大廈出現，因為大業主會留外牆做廣告賺錢。但新式大廈就好少有呢個情況，因為外牆係公共地方，萬一有咩意外，都係告業主立案法團，如果業主立案法團輸咗，就由業主共同承擔。」

黃國桐表示，外牆事故並不罕見，旺角新興大廈為典型案例，1991年有裝修工人於外牆棚架檢查時從3樓墮下，其後工人頸部以下癱瘓，事後新興大廈業主立案法團須向工人賠償2,500多萬元。當時業主立案法團沒有購買第三者責任保險，全棟大廈業主要分攤所有賠償。

根據經修訂後的《建築物管理條例》（第344章）第28條，於2011年1月1日起，所有法團均須就有關建築物的公用部份及該法團的財產訂立第三者風險保險，並須保持該保單有效。每份保單就第三者身體受傷或死亡的單一事故承保額不得少於1,000萬港元。

黃律師補充，以何文田半山壹號個案為例，其第三者風險保險有機會不獲賠償：「第三者風險保險係保意外，即係突然跌磚落嚟就瓜得（扑死人），但依家已經有多次先兆，但冇去理會，咁就要睇返保險條文入面有冇免責條款。」

本報就事件向半山壹號管理公司高衛物業查詢，發言人回應，屋苑於今年6月發生之一宗外牆磚剝落事件，已即時安排相關外牆檢查及維修工程，所有相關損毀申索已轉交保險公司處理。而有關情況亦已向各業主及業主立案法團匯報，另表示屋苑外牆改善工程已竣工。至於問到是甚麼改善工程、管理處有否就外牆牆磚剝落記錄、屋苑由入伙至今出現30宗外牆牆磚剝落事件是否屬實，高衛則未作正面回應。

移民英國全攻略
一連四場Webinar 專家團隊直播解答
首場6月17日晚上9時播放
全球樓行 x 籽想旅行
詳情登入：【港人大遷徙．英國篇】
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
屬於香港人的移民攻略
立即登入【全球樓行】
Dream House零距離