以曼聯嘅名氣同埋財力，相信淨係得皇馬、巴塞同埋車仔，有權截劫佢哋想買嘅球員，真係冇諗過，向來莫財同埋連續5季食白果嘅阿仙奴，竟然夠膽同紅魔爭賓施馬。大家咪以為兵工廠係心頭高，查實佢哋手上有張王牌，就係「法國關係牌」。

我求大俠聽英國班行家講，話如果阿仙奴領隊雲格成功甩咗淨係識得跳草裙舞嘅艾迪巴約而套現2,500萬鎊（約3.2億港元），佢哋董事局就會斥資3,000萬鎊（約3.8億港元），收購里昂嘅法國國腳前鋒賓施馬，實行同賣咗基斯坦奴朗拿度後，手執8,000萬鎊嘅曼聯同埋出價2,700萬鎊嘅皇馬爭過。雖說阿仙奴近年成績冇乜，財力亦欠奉，但佢哋勝在陣中有拿斯尼及沙格拿等法國球員，加加埋埋有成6個咁多，成個「小法國」咁。而且，佢哋嘅法國籍領隊雲格向來同法國球會關係良好，聽聞仲同里昂有口頭協議，他日里昂決定放賓施馬嘅話，會優先賣畀阿仙奴。阿仙奴淨係揸住呢張「法國關係牌」就經已夠殺，絕對有能力截劫曼聯。
再者，雖然曼聯對賓施馬有興趣，但聽聞馬體會嘅阿根廷前鋒阿古路先至係佢哋嘅頭號目標，若然搞得掂嘅話，九成九會放棄賓施馬。雲格曾經話：「賓施馬唔淨止識入波，仲可以幫隊友鋪橋搭路。」

講開艾迪巴約，AC米蘭副會長加里安尼日前親口證實同阿仙奴傾緊，仲話雲格樂意放人。其實艾迪巴約呢位多哥前鋒並唔係AC米蘭嘅首選，禾夫斯堡嘅波斯尼亞前鋒迪施高先至係，但禾夫斯堡講明今夏一定唔賣，只好退而求其次。艾迪巴約舊年喺續約一事同雲格鬧得不愉快，佢要求將周薪由3萬鎊加到12萬鎊，最後以8萬鎊續約至2012年。更重要嘅係，佢加薪後嘅表現不進反退，叫雲格條氣點順呀。如果佢出而賓施馬入，雲格肯定開香檳慶祝。