色字頭上一把刀，紐約人前鋒D威廉士（DerrickWilliams）就因為一夜風流損失慘重，日前佢就帶兩名豔女返屋企過夜，結果第二朝就發覺唔見成75萬美金（585萬港元）嘅珠寶，大拿拿幾乎唔見兩成人工，宜家紐約警方就通緝緊兩位女子，仲懷疑佢哋成為利用美色犯案嘅慣犯，包括月初涉嫌洛杉磯比華利山偷表案。

上兩個月香港就發生有位伯伯因為嫖妓而被妓女偷勞，結果虛報被打劫，最後俾警方拆穿，法官仲要求佢向老伴道歉添。日前就發生NBA版，事件時間喺上周五，紐約人就作客大勝76人107:97，D威廉士就獨取17分，表現都算唔錯，佢當晚返到紐約後就寺夜蒲，喺一間夜店就結識兩名女子，仲帶佢哋去自己位於百老匯大街嘅豪宅度狂歡，當晚發生咩事就呢三個人知，但事後嘅瘀事就通晒天。

D威廉士醒後就發現自己屋企嘅LV背囊同埋一批總值75萬美金嘅珠寶唔見咗，事後佢就報警，紐約警方就通緝緊呢兩位女子，唔知係唔係破財影響心情，上周六主場對公牛，雖然球隊都贏107:91，不過D威廉士都只拎到9分。記者賽後就問佢呢單案，D威廉士就拒絕回應，話警方調查緊唔方便透露。

24歲嘅D威廉士都算運滯，11年以NBA榜眼身份加盟木狼，但限於6呎8吋身高打大前鋒好蝕底，打咗兩年木狼兩年帝王都冇咩料到，今季以400萬美金年薪加盟紐約人，轉打第六人表現都有啲回勇，但今次失珠寶，差唔多損失近兩成人工，但因為兩位女子用假名，要追捕有啲困難，睇嚟D威廉士要搵番啲珠寶真係凍過水。

體蘋果facebook專頁↓↓↓
http://fb.com/appledailysports