台灣歌手黃小琥噚晚喺九展舉行演唱會，邀請咗師弟林俊逸、師妹戴愛玲擔任表演嘉賓。黃小琥着住粉紅西裝出場，唱出《我的心裡只有你沒有他》之後，佢話上次嚟香港開騷已經係3年前，因為仲有幾日就踏入2019，所以自己就當係跨年騷咁做。

到林俊逸出場合唱一曲後，佢用廣東話同觀眾打招呼，黃小琥好羨慕咁話：「你的廣東話比我好，剛才你說甚麼我都不知道。」跟住黃小琥番同林俊逸喺台灣拍咗個電視節目，下個月就會播出。而林俊逸就話：「我知道香港樂迷不太認識我，但我會紅到讓大家都認識我的。」黃小琥之後就同戴愛玲合唱《熱情的沙漠》。

另外，佢又講到19歲開始拎起支咪唱歌，走過嘅路一直都係好唔順利，但自己從來冇後悔，因為對音樂嘅狂熱同熱愛，足以令自己堅持落去。」

黃小琥於騷後接受訪問，問到佢個囡囡同男朋友有冇嚟香港睇騷?佢話：「女兒在台北，長大了，沒有跟來，有自己的事。我說過我們就是房東跟房客的關係，她住在我的房子，我有收她租金，我是一個不太會寵小孩的人。」佢仲話之後會喺家鄉高雄唱跨年騷。

講到噚晚原本開緊騷嘅仲有劉德華，但因為聲沙搞到演唱會要腰斬，黃小琥就話好佩服華仔：「他唱到第14場，我要把他當神拜，每次在紅館開演唱會的歌手，都承受很大的壓力，也付出很多，能夠去到第14場才取消，已經非常利害。」跟住佢對住鏡頭話：「劉德華我拜你，這真是一個大考驗，感到很可惜也很心痛，這根本不是人幹的。」

精選娛聞，喺晒《娛果》
http://fb.com/appledailyent