相信好多朋友近期都聽過，股市就嚟進入「牛三」嘅瘋狂階段，記得有位股壇前輩曾經同敏妮講，炒股同食嘢一樣，不時不食。熊市時，最好就係趁低買大藍籌，當中尤以收息股更加係「上品」，股價低，如果派息穩定，換言之，yield就更吸引。
至於大牛市，最好就買垃圾，越垃圾越買，注碼唔使多，但就分散喺唔同嘅垃圾上面，反正大牛市，一個概念一個傳聞，都可以令山雞變鳳凰。

「賺錢貨」要識分幾注沽

嚟緊係「牛三」，除咗可以參考《一周期權》杜sir所講，用期權策略為牛三做準備。敏妮呢啲鍾意搵money嘅港女，當然亦要預備啲彈藥，準備入市「博亂」。攤開個portfolio，有賺錢股亦不乏坐緊艇等埋岸嘅「藏品」，你會揀邊啲繼續「珍藏」，邊啲先沽套現？
以前嘅敏妮，等錢使要沽貨，二話不說，一定揀有錢賺嘅，因為感覺會好啲，起碼係賺住走嘛！原來同敏妮有相同做法嘅朋友都唔少。點知試過好幾次，賺錢嘅股，沽咗之後繼續升，唔捨得放手嘅就跌得仲深。股壇前輩一聽之下，即刻叫敏妮好好修煉吓炒股心法。唔好嘅股票，再keep落去，頂多俾你等到返家鄉，到時你仲唔「無鞋挽屐」即刻沽咩，賬面睇落冇輸，但當中嘅時間、機會成本，計落一樣蝕。
反而，已經有錢賺嘅股，即係你當日落注時冇睇錯，如果因素冇變，冇必要更改自己嘅信念。
家陣敏妮學精，雖然對於「蝕本貨」，偶然仍唔捨得走，但對於「賺錢貨」，已識得要沽都分幾注沽。

溫敏妮
http://wanmanli.com/blogs/