航空公司跟著名食肆合作做飛機餐多數都係搞噱頭，國泰航空（293）新近為咗吸客，就同麗思卡爾頓旗下米芝蓮一星食府Tosca合作，將於5月1日至7月31日指定航班嘅頭等及商務客艙為乘客提供意大利餐。
國泰企業傳訊總經理Cecilia坦言，今次合作面對唔少挑戰，事關唔係每間食府都想跟國泰合作，一來怕麻煩，要設計適合上飛機嘅食譜一啲都唔易，廚師要好有心機先得，二來擔心飛機餐質素差少少，會影響食府形象。
佢透露，唔少食材通過唔到冷凍、加熱等飛機餐程序，例如，炸物一定肥佬，國泰同事今次都花上一年時間，試咗幾十款菜色先至落實菜單。「其實有錢人好多嘢都食過，所以食材矜貴並唔係重點，最重要係創意。幾年前試過推出菠蘿油等特色食物，反應都唔錯。」