有人入娛樂圈為了追逐名利；有人卻只想好好盡演員本份，黃淑儀兒子徐肇平絕對是後者。為了演戲，不惜放棄大台庇佑，換來被黑名單的命運：「呢個係business，冇嘢做我好明白。」徐肇平慶幸獲ViuTV賞識，繼續堅持他的演員夢。

徐肇平日前在大角咀為ViuTV劇集《娛樂風雲》宣傳，其間他多次感恩電視台給予的機會：「我好好彩，有Viu畀機會我。」談到不簽大台即被列入黑名單的事，徐肇平指事隔多年，仔細部份已經忘記：「淨係記得當日係做舞台劇，我化緊妝，聽到媽咪喺訪問入面講，我都知道講出嚟會影響好多嘢，我記得當時有啲監製想用我，最後都抽起咗。雖然我嗰時喺明珠台都學到好多嘢，但係我真係想拍劇，如果要我喺明珠台做主持，我真係冇乜興趣，簽咁多年做乜呢？」問徐肇平會否覺得娛樂圈好黑暗？他直言媽媽黃淑儀比他更不快，因為他明白做生意就是這樣：「我冇嬲，好彩我冇簽management，仲可以出去做其他嘢。」

他透露拒絕簽約做「親生仔」後，大台依然多番遊說：「有人同我講，你唔簽TVB冇嘢做，我就問自己點解要做呢行呢？我唔係想做大明星，唔係成日想曝光自己嗰啲，我只係想做演員，唔係話IG有幾百萬followers就代表啲乜。我只係想做而家做緊嘅嘢，我一啲都冇後悔。」他笑謂來港前很少用社交平台，但明白來港發展就要接受香港文化：「而家都會用吓social media，成日提自己影吓相，以前真係冇諗過要做。我唔係怕嗰啲好mean嘅留言，最紅嘅人都有人唔鍾意，但係當有人唔鍾意你，你先知道自己原來有impact，Brad Pitt（畢彼特）、Leonardo DiCaprio（里安納度）都有人唔鍾意啦，我又唔識中文，所以冇問題。 」

至於新劇中，徐肇平與ERROR成員何啟華有不少對手戲，他說：「對住佢，我成日忍唔住笑，有時佢又會爆肚玩吓，我好鍾意。因為自己中文唔好，所以我係會跟對白嘅人，不過喺現場排嗰陣，互相爆肚撞啲新嘢，好好玩。」他表示不會刻意叫媽媽捧場，徐肇平說：「我好少問佢咩acting tips，想靠自己處理，我知道人哋永遠都會叫我『黃淑儀個仔』，不過我想自己試吓。」他希望可以長拍長有，終極目標可以在香港及外地同時拍戲、拍劇：「而家中國人演員喺溫哥華好受歡迎，有時間我都會去做casting。」

採訪：盧妹
場地：客廳

-----------------------------
【撐學生】
召集有心人 撐學生全年睇《蘋果》
立即按此