中央落咗三道「鋼閘」，泛民堅拒「袋住先」，政改方案極大機會唔過關，對狼英喺小圈子爭取連任有利，難怪佢呢期心情咁愉快，仲好似越做越起勁，開始為明年初發表嘅施政報告搵吓新點子，以示自己嘅雄心壯志兼收買人心。八方聽聞，佢最近有個建議嚇親唔少官員，原來佢大讚新加坡個夜間野生動物園（Night Safari）好正，覺得香港都應該搞番個！

構想已成官場笑柄

佔地約40公頃嘅新加坡夜間野生動物園，有咩咁巴閉？原來係世界上首間專為夜間動物而設嘅野生動物園，養咗約110種奇異動物。八方聽聞，唔少會涉及呢個構想嘅政策局問責官員同常秘，聽到之後無不擰晒頭，好言相勸好難搞。一嚟香港搵地起樓已經咁難，邊度仲有咁大地方搞動物園，係咪整番好個動植物公園先仲好？再者動物園唔係隨便搞，香港係咪有咁嘅配套呢？據聞狼英仲覺得，呢個夜間動物園可以令一家大細有遊樂之處，社會一定更和諧喎！
據聞狼英呢個構想，已經成為官場笑柄，尤其政改搞到一鑊粥，點解仲有心情搞呢啲大龍鳳？其實政總起咗圍牆之後，好適合做動物園吖，事關籠牢之內，珍禽異獸乜都有：狼英啦、「國寶級」愛國左王邵善波啦、好似馬騮咁坐唔定成日外訪同休假嘅吳得掂啦，以及猶如土撥鼠為地發狂嘅陳茂波等等……已經令人目不暇給，何須再勞師動眾？

李八方
mailto:[email protected]