甄子丹今日喺銅鑼灣舉行「子彈電影傳媒新春午宴」，子丹太太汪詩詩、汪圓圓、湛琪清同湯鎮業一對孖仔湯君慈（Bruce）同湯君耀（ Chris）都有出席。

子丹透露新年剛同家人去澳洲旅行，一行20多人，感覺好舒服又開心，子丹話今年有4部電影在手，忙到不得了，現時正忙緊喺大陸拍《肥龍過江》一片，佢話：「今日凌晨3點先返，為咗拍《肥龍過江》，係一部喜劇動作片，拍完就會開拍《葉問4》，今年仲有兩部戲拍，其中一部係西片，今年總共有4部戲，好full。」

問到子丹片約排到幾時？佢話：「冇諗呀，o依家都揀緊，傾緊嘅都會係明年或後年先拍。」問到《葉問4》會唔會有新演員？子丹就話一切交由導演葉偉信揸主意，不過就唔會再有熊黛林，佢話：「以我所知就冇，佢喺第3集已經過咗身，葉問唔會再娶，因為佢好專一㗎。今次會去美國拍，因為葉問會去搵李小龍。」子丹笑言可以提議吓搵番個紅顏知己，問到會唔會搵老婆詩詩？佢話：「唔得，成間公司由佢run，不過可以提議吓，搵個拖下手仔。」問到今年咁忙點樣補償畀太太？子丹就話：「諗唔到咩方法，我會將所有一切畀晒佢。」係咪連全副身家都畀晒太太？子丹笑話：「呢啲係身外物，最緊要大家健健康康，開開心心，依家好多唔好新聞，生命同家人最重要。」

席間汪詩詩88歲嘅婆婆都有到場，子丹一見到婆婆就攬到實說：「當年我同詩詩拍拖，婆婆係第一個叫佢嫁畀我嘅，婆婆真係有眼光。」

精選娛聞，喺晒《娛果》
http://fb.com/appledailyent