曾編寫多齣經典韓劇嘅韓國金牌編劇金恩淑，先後執筆神劇《太陽的後裔》、《鬼怪》、《繼承者們》、《秘密花園》等經典劇集，每齣劇集贏盡口碑及收視，亦帶挈劇中演員事業再創高峯。

早前金恩淑已落實編寫新作《Mr. Sunshine》(暫定)，故事以朝鮮日治時期(1910-1945)嘅前期、1900年至1905年為背景，一名自發抵禦外敵入侵嘅義軍嘅故事。新劇會講1871年乘坐軍艦前往美國嘅男主角，以美國軍人身份返到朝鮮，與貴族千金邂逅及相戀嘅故事，當中男主角要求英語了得。

之前有傳已久未有新作嘅元斌有望成為男主角，亦有指朴寶劍喺「第53屆百想藝術大賞」對金恩淑行大禮，有網民指朴寶劍積極爭取同金恩淑合作機會。

不過今日韓國方面終於有消息，男主角落實由拍過多部荷李活作品嘅李秉憲擔正，今次仲會係李秉憲喺2009年拍畢《IRIS》後再次回歸公仔箱，唔知李秉憲會唔會憑劇再創事業高峯，被封男神？