唔少商場為吸引人流，不時引入大熱卡通或特別藝術品做展覽，銅鑼灣大業主希慎（014）旗下希慎廣場就搵來韓國人氣嘅LINE舉行大型展覽，噚日開幕起碼吸引二百幾人聚集，打晒蛇餅，唔知仲以為隔籬蘋果店有新產品開售！
雖然唔少人都習慣用WhatsApp，之不過講到LINE嘅卡通公仔，就算唔用個app都好容易被佢哋嘅趣怪表情吸引到。希慎今次除咗搞展覽，仲引入近年開始興起嘅POP-UP store概念，簡言之就係短期租約零售點，售賣多款LINE Friends產品，即日起做到6月4日。
公仔產品來講，大概盛惠200元，但其中一款8GB USB手指，竟然索價302大元，貴唔貴，真係見仁見智。現場見到唔少粉絲豪擲幾千銀咁掃貨，相信總有人認為產品物有所值！