有成300年歷史嘅英國皇室御用酒商Berry Bros & Rudd（BB&R）傳出財困，搞到政商界人心惶惶，因為好多名人都喺呢間公司存酒，好驚公司執笠後血本無歸，八方知道某才女得悉後驚呼：「我咪破產！」查實政商界巧京京，事出有因，因為唔少人十幾年前誤墮酒商大騙局，只有馬時亨因為及時將啲酒運返香港而避過一劫。
單騙局究竟係點？苦主林健鋒現身說法，話十幾年前佢有存酒喺英國，點知有次收到張單，發覺唔多對路，酒商好似賤賣佢啲酒，其後要提貨攞酒都攞唔齊。
某次佢同成班一齊喺呢間公司存酒嘅朋友坐低傾起呢件事，發現大家同病相憐，懷疑集體中招，覺得酒商從中落格，傾到㷫烚烚時仲話要夾錢打官司㖭。但佢哋未採取法律行動，嗰間公司已經宣佈破產，令林健鋒白白損失近百萬。

做官亦走得及時

據佢所知，呢個酒商當時有大量香港政商界幫襯，好似廖創興銀行後人同嘉禾鄒文懷等。林健鋒唔知呢啲人有冇損手爛腳，但好肯定同樣有喺呢間公司存酒嘅馬時亨，「酒」得快、好世界，因為肥馬02年入政府做局長，即刻將啲存酒全部運晒返香港，費事畀傳媒有口實，邊個會估到，肥馬因此幸保不失？
查實肥馬連做官，都深明走得快、好世界道理；佢08年中以患上腦血管病辭任局長，而曾班子同年就因為擴充問責制而管治陷弱勢，結果好多人都大讚肥馬走得及時，唔使捱打，之後仲大把世界撈㖭呀！

mailto:[email protected]