賓架W請吃晚飯,在銅鑼灣中華遊樂會私家房內,大家鬥吹水,月旦時事。中華遊可能係全港私人會所之中,有最多網球場嘅會所,停車場又多車位,若住在附近,來此打波真係方便到極。另一樣最令會員鍾意嘅就係麻將房特別多,在此開枱直落晚飯,好過癮啫,不過吃晚飯就不可要求過高,OK咁啦。
食飯有乜好講,講開投資大勢,無可避免就講到今日香港政治迷局,大家深以為憂,梁振英上台一個半月,新政府不斷受負面新聞打擊,拿不出辦法來,連佢最熟嗰瓣──房地產,在未經深思熟慮,不明香港炒樓文化之下,貿貿然推出5000白表人士免補地價買居屋,十劃未有一撇啫,已觸發細價樓炒風,沙田樓炒到八千蚊一呎,真係不知梁生何以善其後。曾特首兩年前話過豪宅與上車盤係兩個不同市場,內地人專買豪宅,不會刺激上車盤價錢急升。想不到梁特首一上台,就成功將上車盤價格推到上天。
樓價高,租金高,形成劏房有需求,新任發展局局長號稱為「劏房局長」,眾人皆認為陳茂波平時為人老實,但處理危機,全無章法,愈講愈亂,老友們不禁唉聲嘆氣。呢啲嘢,內裏一定有複雜技術因素,如實講,小市民唔明,第三者會計師恐怕亦要聽半個小時先至知得清楚一啲,既然如此,從公關角度睇,最好以最簡單語言直認不諱,係,有咁嘅事,跟住認錯,聲言以後五年任內唔再買樓賣樓,並自即日起辭去所有註冊公司之董事職位,啟動出售股權程序,然後效法日本高官四十五度鞠躬認錯。至於老婆有乜委屈,淚往肚內流,算啦,旁人不明白,無謂多講,出得嚟做高官,兩公婆都要預咗有苦不能言嘅嘞,解釋苦衷亦冇人願意聽。劏房在香港不算罪孽,有其社會需要,可滿足某些階層人士嘅住屋需求,今天劏房等於那些年嘅板間房啫,有何罪惡,若話係僭建,五十年來從無政府部門過問,民間視之為平常。大基金經理K問:「在座誰人住過板間房?」在座五人有三人舉手,就係左丁山、基金K與財務L,財務L住板間房住到中學畢業,左丁山住到攞碩士學位,當年屋企邊度有資格租一層樓住呀,全家人唔住板間房或冷巷床位,唔通瞓街咩。財務L今日在西九凱旋門有樓,回想當年,如果唔係有個床位瞓,邊度有心機讀書考上大學呀。