當年今日
關於我們

【世盃外】自備嘢飲 秘魯驚阿根廷落藥

蘋果日報 2017/10/04 22:25

巴西阿根廷秘魯世盃外南美洲區足球

阿根廷可唔可以出線踢2018世盃決賽周,真係食粥食飯睇今輪國際賽周,而佢哋周四對手秘魯都一樣,到時想食乜嘢就要靠自己,就連飲水都唔使你阿根廷請。
據講客軍秘魯今次去布宜諾斯艾利斯,帶咗幾箱礦泉水同汽水去,飲自家嘢唔飲人地嘢,係因為曾傳1990世盃16強,巴西前球員白蘭高飲完阿軍提供畀佢嘅水後,半場時見暈,後尾球隊亦腳軟軟咁喺16強被淘汰出局,去到2004年,馬勒當拿親自講述返呢件事,承認當時阿根廷係落咗藥。
根局秘魯一名記者透露,就係因為前車可鑑,驚阿根廷又做埋同一樣嘢,秘魯大軍決定帶自己啲嘢去,起碼安心啲,但秘魯隊醫就冇話係因為懷疑對方會落毒,先帶自家飲品去,而係話驚球員體內會出現亂象,想減少水土不服嘅問題。
經過上月比賽後,兩連勝嘅秘魯升上南美洲區積分榜第四位,以得失球差暫力壓同分嘅阿根廷。