【銅鑼灣】最近諸葛紫岐榮升做老闆娘，自資成立經理人公司向內地發展，不過諸葛都仲有抽時間陪吓家人。前晚九點半左右，諸葛同老公薛嘉麟、仲有約十五個月大嘅囝囝薛華韜，連同一位外傭，去咗銅鑼灣時代廣場嘅city'super行街，休閒打扮嘅薛嘉麟一直拖實寶貝仔行。

最初諸葛同囝囝喺化妝品部穿梭，甚少曝光嘅囝囝戴上熊仔帽，穿上黑白橫間外套好奇周圍望。薛嘉麟就自己一個人行嚟行去，行咗一陣薛嘉麟行番去抱起囝囝離開。當發現記者之後，諸葛就向鏡頭打招呼，而抱住個仔嘅薛嘉麟跟隨其後，佢先用帽遮住囝囝塊面，但囝囝顯得好唔耐煩，一家人行去等電梯落停車場，當電梯打開門，諸葛就向記者講byebye，被抱住嘅囝囝就眼仔睩睩咁回望鏡頭。
此外，另一位星媽洪欣噚日約女友人去銅鑼灣買BB衫，不過洪欣睇唔啱冇收穫，跟住佢哋去咗時代廣場嘅city'super買餸，之後仲坐低食咗啲嘢。
採訪、攝影：徐錦池、羅德光