Angelababy(楊穎)同熊黛林嘅模特兒公司師妹陳詩雅(Sarah)曾同王宗堯喺15年拍拖，戀情只得半年就分手，今日《蘋果》就發現Sarah日前就入紙同大佢3年嘅圈外男友劉冠尉結婚。

《蘋果》聯絡過Sarah，佢就表示同男友拍拖年幾兩年：「佢係圈外人做電子線路版生意，婚期就會係出年1月22日，係夾過大家八字決定呢日結婚，到時會喺紅棉道嘅新酒店註冊擺酒。」

酒席方面，Sarah話會擺二十圍酒：「都係會有接新娘、註冊同擺酒，簡單擺酒儀式，我都會請埋經理人Kim嚟飲，睇吓佢到時得唔得閒。」

講到求婚過程，Sarah表示男友一年前同兩家人去加拿大旅行時求婚，場景係喺一個湖邊，過程就唔仔細講喇。問到佢婚後會否即生B？佢就話同未婚夫都好鍾意小朋友，都會順其自然，婚後都會繼續做模特兒工作。

更多娛聞，喺晒《娛果》
http://fb.com/appledailyent