今早（10日）開操早段天陰陰，時晴時雨，耙地後曾落過毛毛雨，尾段又陽光普照，猶幸場地未受到影響！

今季告東尼獎準得主何澤堯，於周三（12日）泥地夜賽騎足八場，本身在對上四次全泥夜宴雖均食白果，但當晚絕對有望贏馬，須知他到時其中兩匹座騎，於今天晨操時均顯得非常勇銳。

「好吉利」少少岳頭乃慣性，按慢而回充滿殺氣，似有股力量正待爆發；「榮冠大道」助手跳，入彎前已短韁捉到實，恐防重口馬越走越勁拉唔住，走過渾身是力，神態相當活躍，上場終見真章，搏完狀態更見勇邁。

「榮冠大道」上次跑較盲門的谷草2200米路程，仍能跑入第二名。今次回師曾經贏馬的泥地1650米，更排得1檔好位起步，可望藉此打開勝利之門。

-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX