練馬師告達理今個禮拜五59歲牛一，十三屆冠軍騎師韋達好識Do，見佢第六場配田泰安之「香江福星」搏輸，尾場韋達即幫告達理贏隻「雪風神駒」補數，向佢送上一份最佳生日禮物，而韋達自己連埋第二場贏「愛寶」在內，連續第二個賽日雙喜臨門。
「神駒」系上周三有「香港神駒」出擊失手做阿二，呢晚「雪風神駒」幫佢哋收復前失，馬主余國賢憑呢匹法國自購馬，於法國之夜食尾糊，別有一番風味。至於大告呢晚賽前，已經成個月食白果，谷草更加自3月5號以後未威過，最終佢喺自己牛一之前，憑「雪風神駒」一洗頹風，呢一W可謂來得合時，不過全晚未見大告出現，錯過拉頭馬。