當年今日
關於我們

Netflix 香港 2020 回顧│最受歡迎十二套人氣節目韓劇完勝未睇唔係罪《后翼棄兵》實至名歸唔上榜先奇——二喬

蘋果日報 2020/12/15 13:31

果籽讀戲室二喬2020年度回顧Netflix后翼棄兵Emily in ParisThe King:永遠的君主雖然是精神病但沒關係#AliveNetflix 香港

Netflix公佈2020年香港人氣最高節目你睇咗幾多?
2020年係Netflix天下,真正大台變咗係佢。當你發現人人都講緊《后翼棄兵》時而講唔出另外個台播緊乜劇,就知到佢有幾大。他們還剛剛公佈「2020年香港人氣最高各類型節目」,大家不妨睇下自己有幾in或者有幾out。
2020年香港人氣最高各類型節目:
動作:《驚天營救》(Extraction)
喜劇:《艾蜜莉在巴黎》(Emily in Paris)
紀錄片:《BLACKPINK: Light Up the Sky》
劇情:《后翼棄兵》(The Queen’s Gambit)
奇幻:《The King:永遠的君主》
兒童親子:《海綿寶寶:急急腳走佬》(THE SPONGEBOB MOVIE: SPONGE ON THE RUN)
實境節目:《慾罷不能》(Too Hot to Handle)
浪漫:《雖然是精神病但沒關係》
科幻:《末世列車》(Snowpiercer)
驚悚:《屍戰朝鮮》第二季
恐怖:《#Alive》
日日喺屋企,大家都變專家。呢度十二套話唔定你都睇咗九成,趁年尾我們不如盤點一下。

《后翼棄兵》大贏家

《后翼棄兵》(The Queen’s Gambit)係大贏家,叫好叫座,今年最佳劇集應該當之無愧,差唔多你識嘅人睇完都會講幾句,好似我哋副刊健筆顏純鈎方俊傑都會同大家深入剖析下咁,唔似得二喬睇完,除咗覺得好好睇呢三個字之外,就已經講完成個感受。
empty
《后翼棄兵》(The Queen's Gambit)叫好叫座,上榜實至名歸。

韓劇天下

除了是Netflix天下,也是韓仔天下,無論是紀錄片、浪漫、奇幻、驚悚以及恐怖(恐怖原來同驚悚真係有唔同,學到嘢 ) 等類型都係大贏家。「恐怖」片《#Alive》,果籽影評永高形容為小本經營的小品喪屍片,「係唔錯,套戲講有一日突然韓國有喪屍病毒,然後就講一個淨係識打機廢青點樣留喺屋企,防止喪屍入屋。所以成套戲有一半係男主角足不出戶,勁低budget,但又唔悶。」
empty
低成本「恐怖」劇《#Alive》。(網上圖片)
其他幾齣,韓迷係專家,唔使我多講。《The King:永遠的君主》曾一度給網民評為「渣劇」,點解咁受歡迎,相信當中不少都係一路睇一路鬧嘅人,劇評人LY認為平心而論該劇瑕不掩瑜,可以畀次機會佢同李敏鎬。韓國收視一般的《雖然是精神病但沒關係》,在Netflix熱播,大概跟觀眾對服兵役後復出的金秀賢寄予厚望,今次劇情有深度,佢唔再演卿卿我我大路愛情故事,已經值得捧場。《屍戰朝鮮》(前譯《李屍朝鮮》)唔係一般喪屍片,身邊擁躉多,方俊傑更指第二季中「攬炒之母」爆出金句港人有共鳴:「我咁辛苦先坐到呢個位,你要趕我落嚟?我毀滅一切都唔益你哋呀!」至於科幻美劇《末世列車》,改編自《上流寄生族》導演奉俊昊同名電影,靈感亦是來自韓片。
empty
《The King:永遠的君主》曾一度給網民評為「渣劇」。(網上圖片)
最後 BLACKPINK 毋庸置喙,一定係好睇。首先劇評阿蘭係忠實歌迷,所以見到偶像們真情流露攬埋一舊喊的紀錄片,點會唔推薦。阿蘭唯一鬧爆《Emily in Paris》,佢就話只係套膚淺港女劇,冇乜營養,越睇越嬲。不過各花入各眼,二喬亦有朋友真心喜歡,等於有人喜歡千嬅《麥路人》 夠勵志的道理一樣,人人的焦點不同,我是理解的。至於阿Emily係咪真係咁靚女就見人見智,正如死黨佐治講人哋Netflix做《陰宅怪事》個女主角Victoria Pedretti 扮鬼都靚過佢,這個我係同意嘅。
empty
港女劇《Emily in Paris》的角色、劇情、樣貎、衣着都掀起不少話題。(網上圖片)
《海綿寶寶》廿年長壽動畫歷史悠久,MEME圖必cap,好多人鍾意,尤其是有一定年紀的朋友一定記得。不過呢個3D電影兒童親子版,明顯係畀小朋友睇,好似唔係好啱大人。「我係海綿寶寶fans,不過新果套3D動畫唔好睇,無晒啲黐線嘢。」永高說。冇錯,Fans都係貪佢夠Mean夠賤,冇咗就不如睇番魚樂無窮算。
當然大家仲有好多選擇,唔睇韓劇可以睇日劇,也不能說好嘅都喺Netflix,你冇HBO,點睇《The Undoing》呢 ? 如果又冇Amazon Prime,又點睇《The Expanse》呢 ? 科幻劇《The Expanse》, Netflix以前都播過,不過製作的Syfy一度放棄投資,如果唔係Amazon救返,大家下周都冇機會睇第五季。呢個世界其實好大,唔係Netflix玩晒。
撰文:二喬
-----------------------------
低頭族上班族必睇 伸展+穴位按摩自救緩痛
《保健精讀:痛症(頭肩頸)》
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁