袁詠儀（靚靚）今日到圓方出席珠寶店開幕剪綵，同場有鍾浠文同姜美兒展示珠寶，當靚靚出場時，全世界大嘩一聲，因為靚靚着咗件開胸衫，deepV落到肚臍，仲見晒波邊勁性感，靚靚見到大家咁大反應，佢都有少少尷尬咁笑，但表現自信，現場有剪綵同祝酒儀式，佢全程都好小心掩住心口驚走光。

問佢件衫係乜牌子？靚靚話：「唔知，今次交畀形象決定。」之前知唔知件衫係咁？佢話：「有睇過試過，我成日問打底方面要點？我哋咁舊派，可唔可以自己戴胸圍？問十個九個話唔應該。」問係咪真空上陣？靚靚坦言：「梗係。」選美後最性感呢次？佢話：「係我極限，形象話可試唔同形象，有新鮮感多啲人搵可出席唔同活動。」

問怕唔怕老公話你？靚靚話：「呢件真係冇畀佢睇過，都唔知點講，唔覺得佢會安慰我先，一係讚我一係打擊我，唔想未着收到任何唔公平對待。」老公支唔支持你性感？佢話：「佢支持，反而自己擔心點打底，之前仲問專家周汶錡小姐，佢好好，贊助埋我雙面膠紙同乳貼，佢都覺得好神奇，一個女人屋企點解冇砵仔糕，算啦，我去僭建都唔係我style，夾硬迫條線唔係我個樣，最緊要自然同做自己，周汶錡連黐邊度都話埋畀我聽，老公覺得唔過份，我個樣健康都ok，暫時未收到任何評語。」

呢刻好有自信？佢話：「我有自信，唔係假嘅。」唔係假，咁有冇托？有冇做手腳？佢話：「冇呀，我都唔識托，我有少少新人嘅感覺，好緊張穿唔穿崩。」最驚走光？佢話：「我覺得ok，唔係特登攞出嚟嚇人。因為我覺得揀衫要睇多啲珠寶，唔通揀樽領衫。」今次咁博收好多錢?佢話:「舒服價錢，都好，未試過，適當場合先着，唔通百貨公司剪綵着到咁咩。」

會唔會叫老公Chilam買珠寶畀你？靚靚話：「梗係會，唔會避忌，佢唔會成日買，佢話搵錢辛苦，叫我唔好鑿佢，已經少鑿咗。」之前你生日有冇送珠寶？佢話：「呢啲通常年頭收晒，見到想買已收定情人節、生日禮物。」老公係咪送珠寶多？佢話：「都會，又永恒啦，佢成日講送嘢畀我戴好過送衫着幾日唔着，我都好尊重佢，睇完鍾意珠寶會影相畀佢睇，或下次帶佢去當場畀錢。」有冇詐型你買得太貴？佢話：「視乎經濟能力唔會充大頭鬼，兩個人唔講物質就好難，但唔好過份要求，出自個心。」