亞洲第一女首富、華懋主席龔如心，周二突然因病離世，網友惋惜之餘，亦開始對小甜甜300億身家何去何從十分「關心」，其遺產最終由誰繼承？有多少撥歸慈善？
Garfieldhui率先喺《香港討論區》發起「分身家」投票活動，結果有16票（44.4%）認為「捐晒做善事」、12票（33.3%）覺得「老媽子同細佬兩份分」、5票話「齋畀老媽子」、畀晒老爺王廷歆就僅得兩票，留畀醫生細佬龔仁心就只得一票。

騎呢建議畀古天樂

不過，投票選項差少少，ayyy提醒：「佢（小甜甜）有個契仔㗎！」域克狂想：「喺地鐵站派街坊！」joepau最騎呢：「畀古天樂。」真係百思不得其解。
Alexander.shum一副大狀口脗：「老爺和細佬，在法律上好似唔係直系親屬，如冇遺囑，只可以給直系親屬，如夫/妻，父母、子女、孫等等。總之，有遺囑跟遺囑。」
hippo887冷語：「爭爭爭，咪又係帶唔到落棺材。」其實，按法例，財產擁有人若配偶過身，冇仔女或遺囑嘅話，以有血緣關係嘅繼承人係咪在世為先決條件，將財產分畀以下嘅人，優先次序係父母、有血緣關係嘅親兄弟姊妹、半血緣關係嘅親兄弟姊妹、袓父母或外袓父母、伯父、叔父等。如果都冇就會歸政府。
http://www11.discuss.com.hk/viewthread.php?tid=3851702&extra=page%3D10&page=1