【是日必炒】北水受惠股點揀？（魏力）
港股是日必炒北水魏力
今日美股假期休市，港股睇怕都係死跟阿爺，熱炒科技股回氣之際，今日市場焦點應落在北水新貴，特別是獲納入深港通的「佳麗」，市值較細易舞動，開市金精火眼睇實邊隻開車，順勢短炒即可。
睇番最新入選恒生綜合指數的股份，一共有32隻，扣除7隻被拒門外的「B仔」，都有25名佳麗，點揀至好？魏力鍾意用刪除法去揀，先剔除本地薑（如鷹君、大新銀行等），再篩走業績超爛（如慕尚集團）、知名度低（如匯景控股）等股份，剩下主要分三類：一、知名度高的巨無霸，例如信達生物（1801）、百濟神州（6160）；二、高增長股，如物管股永升（1995）、寶龍商業（9909）；三、知名內需股，如九毛九（9922）、日清食品（1475）。
第一類市值超大，推郁比較困難，百濟神州更會受制美股表現，業務雖好，但買入要有揸中線心理準備。第二類永升、寶龍商業近月已不斷在網台、專欄跟進，讀者應不會陌生，前者超高增長，後者概念獨特，各有賣點。第三類方面，魏力較睇好九毛九，一來係大媽熟悉的品牌，二來標準化的經營模式，有助高速開店，推動營收高增長，憧憬會比即食麵股日清高得多。
戰友不妨開市前執個list，將潛力股入落報價機，自然可以快人一步，理想達到。
-----------------------------
-----------------------------
-----------------------------
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於
《蘋果日報》你的優惠 網上獨家發售！