移民英國｜港夫婦搞執垃圾活動助融入社區 英國人：不會怪港人移英
蘋果日報 2021/06/08 16:12
移民英國列斯列斯大學張國榮曼爸
「移民英國？你哋做硬二等公民，聽執垃圾啦！」移民前，曼爸（筆者）最常聽到的「詛咒」，就是祝福移英港人「聽執垃圾」。也許是天從人願吧，或是報應不爽，筆者到埗後確曾執過垃圾，不過卻是笑住執、挺起胸膛地執。筆者並沒有後悔來英後「要搞到執垃圾咁嘅田地」，反而有點懊悔為何在港時不多參與這等活動？是香港的公德意識比較薄弱？還是香港人沒有這種閒情逸致？
「見到Manchester（曼徹斯特）有香港人發起執垃圾活動，咁當時我哋有位朋友就話，其實我哋Leeds（列斯）都可以做呢樣嘢喎！」列斯港人執垃圾活動搞手之一的AY及Ellen兩夫婦，來英多年，80後的Ellen在1996年隨父母移居英國列斯，而同樣是80後的AY則於2011年到哈德斯菲爾德（Huddersfield）讀大學，二人於教會邂逅，並於2018年攜手走進教堂。
筆者當日戰戰競競於網上報名，帶同一家大細到列斯參與此次「執垃圾義工活動」，原本只是想小朋友學會公德意識與公民責任，豈料卻因此認識了此次活動搞手之一的AY夫婦，讓筆者感受到在英港人「爭氣」的一面。
「執垃圾」活動當天，有近50港人參與。
那天下着大雪，也還只有6度，筆者一度以為活動會取消。還好天公懂得看風駛舵，活動一開始，雪就say goodbye了。
50多人參與 盼讓英國人了解港人願融入
「嗰日又落雪啦，我諗住可能得十零個人嚟⋯⋯」Ellen事後仍展現出當日那份擔憂。「差唔多50人呀！」老公AY在旁安撫着。4月的那天還只有6度，早上也下了一抹大雪，從曼市驅車來到列斯的我，也曾害怕「摸門釘」無功而返。然而，香港人總是堅毅的，哪怕只是一場執垃圾活動，無懼四月飛霜的、一直還在堅持的香港人，看來也為數不少。
「我哋希望可以畀當地人知道，香港人願意融入英國呢個社會。」為此事籌備約兩個星期的AY，並沒有把執垃圾成果大鑼大鼓地宣揚，卻是默默耕耘的「在心中」。「計滿嘅話我估（執咗）廿幾袋啦。我哋攞（垃圾）膠袋時有同負責hold膠袋嘅人（英國政府相關人士），講返我哋嘅理念出嚟⋯⋯但就無話特別將執完個效果拎出嚟畀人睇，只係將執完嘅相放返喺自己嘅group度，互相勉勵吓自己做咗呢啲成績。」
AY與Ellen兩夫婦為此活動籌備約兩周，成果卻十分豐碩。
當天共撿拾超過20大袋的垃圾。
理解港人處境 「為逃避政府逼迫移英」
口口聲聲說想讓本地人明白香港人願意融入社會，那麼在列斯的英國人又如何看待香港人呢？Ellen帶筆者遊走列斯街頭，訪問了兩位英國人Jay及Flaveio。原來他們也從新聞當中得知香港的示威事件。「我覺得這令人很傷心（I think it’s really sad）。」 曾到訪過香港的Flaveio如是說。AY表示，脫歐其實也有反移民的情緒在其中，但他也曾跟其英國同事們討論過，同事們大抵表示：「如果你願意工作、融入社會、唔攞福利嘅話，其實佢哋好歡迎香港人嚟到英國。如果你需要逃避原居地政府逼迫而嚟到英國，佢哋會覺得係好囉。」
英國人Jay表示不會怪責港人移居英國。
曾到訪過香港的Flaveio，則表示對於香港的示威活動感到「really sad」。
離鄉背井從來不易，但有一種文化卻會讓港人感到「十分易適應」，那就是香港人最鍾意的「返工」了。「佢哋着重work life balance，我工作嘅地方有啲同事係父母（身份），有機會要遲到早退，咁公司都接納呢樣嘢。」AY馬上接老婆「口水尾」道︰「真係冇OT文化，5點喇，佢就預你收工，我5點準備執嘢，但啲同事已經去攞車。如果你未走，老細會問你做咩未走囉！」
列斯屬於移民城市，路上遇見的不僅是白人，也還有很多來自世界各地的黑人。
走訪張國榮母校 獻花緬懷敢言偶像
訪問中，曾就讀於University of Leeds（列斯大學）的Ellen，帶筆者到校園內蹓躂。原來哥哥張國榮，當年也曾就讀於列斯大學紡織系。「今年4月1日可能多咗香港人嚟列斯，都有一個活動係去列斯大學，大家去獻花，緬懷呢個敢言嘅偶像。」今天該很好，你若尚在場，但筆者倒也在想，也許哥哥是幸福的，能夠去到一個寧靜的地方，毋須承受今天活在香港的顏色壓力，又焉知非福呢？
哥哥張國榮曾就讀於列大學紡織系。
紡織系校舍門外，就置着一束束悼念的鮮花。
列斯港人在4月1日留給哥哥的字句。
「老移民」無脫離華人圈 僅接收部份資訊
「點解啲人移民得耐會變藍？」近年倒是有不少例子，移居太久了人也「藍咗」，究竟藍絲是如何煉成的？對於移居英國有一段時間的AY夫婦來說，也許深明箇中道理︰「一來可能件事本身對佢哋嚟講有距離，政府講乜佢哋都覺得啱；另一個原因係，本身嚟得耐嘅香港人，佢哋都唔係好融入英國呢個地方，可能佢哋嘅生活圈子，都係打緊華人工，喺唐人街聚集，食嘢食緊中菜，佢哋思想上未離開華人圈子。」「另外就係當佢哋覺得中國人開始威嘅時候，自己都有啲叨光嘅感覺，所以點解你『攪亂』香港、『搞衰』中國時，佢哋會覺得好似冇咗面咁。」
「因為我喺香港出世，咁一個香港人，其實好難唔去睇香港新聞、香港嘅嘢。」移居英國25年的Ellen，仍然關心着香港的一切。「可能係個人價值觀、屋企教育、成長時接收嘅資訊，你自己要作出一個判斷，但佢哋（藍絲）接收嘅資訊係一部份，而唔係全部。」當筆者問到兩位有甚麼說話想跟香港人說？AY毫不猶豫搶先答︰「唔知香港會再點樣困難落去，可能惡化到我哋難以想像，所以要走就好走⋯⋯」Ellen則感觸地說︰「雖然我哋喺英國，你哋喺香港，但都想畀你哋知道，我哋仍然關心香港發生嘅事，關心緊你哋，都會繼續為你哋打氣。」
AY與Ellen兩公婆移英已久，對列斯的一切所知甚多。
後記︰我想睇Mirror演唱會！
撰文︰曼爸
攝影：Dominic Leung
編輯：洪慧冰、鄒仲安
-----------------------------