勇士喺禮拜一嘅NBA常規賽再次上演大逆轉，上半場最多落後21分之下，憑住第三節力追，以125:115反勝主場嘅塘鵝。不過，勇士今場唔止有杜蘭特（Kevin Durant）同吉辛斯（DeMarcus Cousins）口角而雙雙喺最後1分14秒被逐；仲有今場破三分波紀錄嘅史堤芬居里（Stephen Curry）喺最後一分鐘扭傷右足踝離場，好彩勇士證實佢照完X光後，確定冇傷及骨骼。

面對連續第二場有安東尼戴維斯（Anthony Davis）因傷缺陣嘅塘鵝，勇士上半場以49:69落後，但勇士喺第三節搶攻模式啟動，一撻着就打出一段15:0嘅攻勢，喺眾將合力下，居里全場拎到31分、11個助攻雙雙嘅成績，而且射入五個三分波，為第八位生涯累積三分波達到2,000球嘅球員，亦都係NBA史上最快射入2,000球三分波嘅球員，比之前紀錄保持者阿倫（Ray Allen）快咗227場。
居里傷出後，據報仲要撐枴杖才先可以由更衣室行去X光室，好彩檢查結果話冇傷到骨骼，但係足踝就腫得好勁，都總算不幸中之大幸。