《蘋果日報》26年的歷史，到今晚即將落幕。一眾忠實讀者於晚上到壹傳媒大樓外淚別《蘋果》，有人高舉「支持蘋果」的頭版報道，亦有人大叫「撐蘋果，撐到底」、「我們不會認命」、「一息尚存，抗爭到底」，亦有人對《蘋果》道謝，「多謝你哋呀《蘋果日報》」！

讀者盧先生於晚上8時許到壹傳媒大樓外，並自備畫簿記錄大樓外貌，「last day喇，好傷感知道呢個消息，諗住用我熟悉嘅方法去記低熟悉嘅嘢，我冇諗過有咁多人，一路畫個氣氛都好好」，坦言見到香港人紛紛前來支持《蘋果》很受感動，「對上一次咁多香港人走埋一齊做一樣嘢，已經係好耐之前嘅事」。

盧先生指，自己已支持《蘋果》20多年，「以前唔覺好重要，當啲嘢越嚟越少，呢種聲音就好珍貴」。盧認為，《蘋果》是代表香港人的聲音，「而家係《蘋果》（被打壓），下個係咪就係到香港呢？我但求呢個地方嘅人平安，包括公義，包括心靈上平安」。盧寄語《蘋果》人平安，「呢樣好緊要」。

教育界吳小姐亦到場支持，她指近日對《蘋果》發生的事感到心痛，「喺屋企又唔知有咩做到，希望到場支持下」。她指，《蘋果》的消失是因為政權打壓，代表港人被扼殺自由，「唔係因為無讀者，係因為政權打壓」。

吳笑言，自己從小已跟隨家人追看《蘋果》，至今已有20多年，尤以佔中運動報道最為深刻，「有好多報紙都唔係好敢寫啲敏感字眼，但唯獨《蘋果》敢，肯講番個真相出嚟，亦每一日更新個情況，知道社會發生咩事，我唔知之後仲有冇呢啲平台」，亦擔心其餘媒體均會受到被打壓命運，「我唔想7月1號見到所有媒體都係清一色嘅聲音」。吳感謝《蘋果》人的堅持，「好多時有好多人身威脅，但仍然堅持落去，多謝你哋每一個人肯為香港市民報道真相，未來可能各散東西，但希望大家有一日可以再團結返」。

同樣是教育界的劉先生，則希望到場見證歷史一刻，「影吓呢幢大廈，唔知第時啲警察會唔會又封鎖晒呢度，有機會見證時就見證吓」。劉指，自己亦由創刊開始讀《蘋果》，「初初好搞笑，買《蘋果》係送蘋果！」笑言自己最愛讀「採訪手記」，「係啲記者寫下採訪時有咩深刻，其他媒體好少見呢種，都好深刻」。

對於《蘋果》的離去，劉指「中共會好喜歡見到呢個畫面，好和諧」，「全部報紙一式一樣，想落咩廣告你畀錢就得㗎喇，咁其實唔使要咁多報紙，你出公告咪得囉」。劉先生感謝過往26年曾在《蘋果》工作的員工，「過往咁多年為香港報道真相，冇咗你哋但我哋留返有用之軀，總有日會重聚，總有日會繼續發光發熱」。

胡小姐手持日前「支持蘋果」的頭版到場撐蘋果，她哽咽指，自己生日正正於7月1日，「我冇諗過係你哋最後一日，陪我過唔到生日」。胡支持《蘋果》20多年，「你哋所有創刊嘅嘢我都有齊，但好無奈而家要封鎖新聞自由，我好希望我哋有朝一日同你哋（蘋果）會再相遇」，又指自己不會再讀其他報章，「其他報章對我哋已經冇意義，因為已經冇咗自由，新聞已經係被封鎖咗，我會堅守睇網媒，希望換個方式再行埋呢條最難行嘅路」。胡寄語《蘋果》人繼續保持熱誠，「希望黎生早日平安歸來，我哋會用另一種方法繼續守護真相」。

-----------------------------

蘋果App大升級 更簡潔更就手！了解更多（立即下載體驗）