英超公布9月份最佳球員嘅候選名單，總共有7人入選，當中有3人來自狀態火熱嘅雙曼，而紐卡素同埋白禮頓亦各有1位球員入選。

入選嘅就係曼城前鋒阿古路、中場奇雲迪布尼，曼聯前鋒盧卡古，熱刺前鋒哈利卡尼，車路士前鋒艾華路莫拉達，紐卡素後衛拿修斯同埋白禮頓中場柏斯高哥斯。

要數當選嘅頂頭大熱，就梗係7場英超入7球嘅盧卡古，佢嘅表現完全值7500萬鎊嘅身價。至於曼城嘅阿古路亦都唔弱，佢喺英超上陣6場入6球，上月作客對屈福特更大演帽子戲法，大炒主隊6:0。車仔前鋒莫拉達亦令人忘記迪亞高哥斯達（DC）嘅存在，主帥干地更大讚佢係做女婿嘅材料。

拿修斯就可能唔係咁顯眼，但身為紐記隊長嘅佢，今個月先後射入兩個奠勝入波，助球會擊敗史篤城同埋史雲斯全取6分。而白禮頓嘅柏斯高哥斯亦都係球隊嘅進攻主力，佢月初梅開二度，助球隊主場以3:1擊敗西布朗。

英超同時公布9月份最佳領隊嘅候選名單，佢地分別係哥迪奧拿、摩連奴、普捷天奴同埋雲格。投票喺英超官網舉行，到下周一截止投票，未投嘅就要快啲喇！