【開心都嚟唔切】爆蕭正楠拍劇心神恍惚 洪永城:尊重佢哋嘅私隱
夫婦蕭正楠洪永城黃翠如
蕭正楠喺今年台慶頒獎禮突然爆驚喜,佢喺黃翠如手上拎咗「最受歡迎電視拍檔」之後,突然喺台上爆出一句:「多謝我太太黃翠如。」原來佢哋今年4月已經喺新西蘭正式註冊成為夫婦(新聞連結: https://bit.ly/2rGnP4j )。
今日洪永城喺深水埗出席活動,講到翠如結婚,曹永廉竟然比佢仲早知,唔知又有冇覺得嬲呢?洪永城就話:「我真係唔知,我都係喺現場同觀眾一齊感受呢件事,佢哋收得好埋,我尊重佢哋嘅私隱,我冇嬲,反而覺得佢哋宣佈嘅時間好好,我戥佢哋開心都嚟唔切喇,遲啲約佢哋食飯!」洪永城仲話唔怪得之前一晚見阿蕭拍劇有啲心神恍惚,原來係為咗呢件事。
講到《大帥哥》喺今年台慶全軍覆沒,蔡思貝同楊秀惠話為張衞健失落視帝覺得唔開心,蔡思貝覺得Dicky功不可沒,楊秀惠就話:「Dicky永遠都係我哋心目中嘅視帝!」
精選娛聞,喺晒《娛果》
http://fb.com/appledailyent