當年今日
關於我們

【金手指】大陸中文侵蘋果(孫柏文)

蘋果日報 2019/06/03 21:00

錦州銀行孫柏文爆煲包商銀行

近呢幾年,孫柏文喺街遇到啲fan屎時,好多時都會被問到「大陸啲銀行好唔好買?」而我最鍾意就係反問,點解佢對呢啲銀行咁有興趣。答案永遠都係「好抵、高息」。而我每次都會好禪咁話:「施主,06年啲美國做按揭嘅金融股,都係好抵同高息呀。」
上周,大陸嘅包商銀行被接管。作為一個對接管資不抵債銀行咁冇經驗嘅國家,人民銀行開記招解釋,都講得幾清楚。啲5,000萬人民幣以下嘅債權人,政府全包底。而以上嘅就話會攞番超過八成喎。
講真,呢啲新聞最驚就係爆擠提潮,銀行系統總存款下降。不過大陸本身提款都咁難,最多轉晒落去自己嘅WeChat Pay、Alipay。一樣冇得走。唯一就係買晒落Bitcoin。
不過,人行記招有個位應令唔少香港人震一震。就係完全冇交代啲股東點。唔講,即係冇得賠。好啦,尋日就話已停牌3個月嘅錦州銀行(416),佢嘅會計師EY辭職。揸住錦州嘅股東們,你哋啲錢都係凍過水了。咁喺眾多出唔到2018年年報嘅大陸銀行中(我喺gab分享咗個成個表),論負債排名,包商排四,錦州排第二。
最後,本報報道,人行話包商係「一個個案」(乜嘢chinese is this?),又話「依法支持,實施收購承接,是一種比較穩妥的方式」(OMG)。老實,因仲有大把大陸銀行要爆,係時候編輯準備定大陸話翻譯做中文嘅詞彙。好似當年Subprime叫「次按」咁。
孫柏文
https://gab.com/shuen