當董太返埋位冇耐,個天就落起大雨,一眾解放軍大兵哥急急腳走上台幫出席嘅嘉賓擔遮。唔知點解坐喺董太左右兩邊嘅解放軍司令都有士兵擔遮,惟獨漏咗董太,要佢喺度淋雨。董太眼見自己冇人遮,忍唔住急急腳攞起把大會供應嘅遮嚟自己擔,嗰時左邊嘅副司令員董文久先至發覺唔妥,即時叫身後嘅士兵移去幫董太擔遮,至保住佢唔使成身濕。
去到結業禮尾聲,一百名小兵哥向一眾嘉賓、家長同校長表演一套十六式軍體拳,經過十二日改造後,不單止耍得有板有眼,重拳拳有力,連坐喺董太身邊隔咗一個位嘅董生都忍唔住技癢,喺位度揸拳推手咁模仿台下學員嘅姿勢。睇嚟令佢要辭任嘅腳痛,已經唔再困擾佢咯。
講番呢一百名參加夏令營嘅青少年,佢哋個個都好似脫胎換骨,八方記得入營時訪問佢哋嗰陣重係嬌生慣養嘅少爺兵,但噚日見到佢哋真係好似變成一個誓要保家衞國嘅準軍人。連教統局常秘羅范椒芬都大讚計劃成功,重諗住出年再搞。
爆料熱線:29290000、27860099
報料傳真:26239278
報料電郵:
[email protected]