陳展鵬最近與無綫新劇《巨輪》拍檔貝安琪傳緋聞之際，前晚有網民喺親子王國討論區，指陳展鵬已於大馬結婚，留言謂：「我c6以前個朋友個家姐同鵬鵬係（喺）大馬已經結左（咗）婚嫁（0架）啦！」

記者昨日致電展鵬，佢一聽到呢件事後，即哈哈大笑，兼否認話： 「梗係冇呀！0依家興吳尊咁秘密結婚咩？我冇喺大馬結婚，香港就有結，拍劇嗰陣呀！」 咁同貝安琪係咪拍拖？陳展鵬話： 「梗係唔係啦，嗰日成班人一齊去睇張繼聰個騷咋！」

呢頭傳陳展鵬同貝安琪撻著，嗰頭噚日又有報道指貝安琪同吳嘉龍撻着三個月，兩人仲被拍得尖沙嘴行街相，陳展鵬笑說：「佢咁多呢啲新聞嘅？」貝安琪就話同吳嘉龍只係朋友，唔係拍拖。

其實陳展鵬之前都有個「疑似」女友，就係前亞洲小姐冠軍姚佳雯，更有報道話兩人同居兩年幾，但報道指陳展鵬為咗前途，惟有被逼玩地下情，向外聲稱單身。最後姚佳雯另嫁他人，上年同西安李姓富商結婚。

亦有網民打趣笑陳展鵬同李司棋先至係一對，因為佢兩個喺《心路GPS》飾演兩母子，喺《巨輪》又係演母子，而且對白又肉麻，所以笑佢哋先係一對喎。