財爺買車避稅群星抨擊
方中信兩名車一偷步一撻定

蘋果日報 2003/03/10 00:00


方中信早前打算買兩部新車,但當財爺梁錦松日前增加汽車首次登記稅後,雖然方中信在加稅前買下平治SL55,變相慳了約六十萬,但另一部林寶堅尼卻因加稅要多付一百萬,最後惟有撻定。
方中信原來在財政司司長梁錦松宣布大加汽車首次登記稅當日上午,以一百七十萬購入平治SL55,剛剛趕及在加稅前買車的他,變相省回六十多萬。不過方中信並非像梁錦松般偷步買車,而是忽然心血來潮,將半年前已購入的法拉利換掉。

好姨打消買車
方中信昨在電話中說:「我估汽車首次登記稅就實會加㗎啦,但邊度估到加咁多呀,初初我個心重十五十六,好在早咗買,如果唔係就要畀多好多錢。」
然而方中信早前訂購的dreamcar、價值二百萬的林寶堅尼gallardo,卻因今次加稅而迫於無奈撻定。
方中信歎說:「𠵱家買要畀多一百萬,即係成三百萬出車,當埋底褲都唔掂啦,邊度有咁多錢呀!咪惟有撻定囉,嗰度唔係蝕好多錢啫。」
而薛家燕(好姨)原本有意買豪華van,亦因大幅度增加汽車首次登記稅,而打消買車念頭。
好姨昨在電話中說:「𠵱家經濟環境唔好,大家唔肯消費,對我哋藝人都有影響。」對於梁錦松偷步買車,好姨說:「我諗佢唔係有心咁做,不過𠵱家佢話拎十萬捐去慈善機構,咁都好嘅,呢次教訓佢下次做嘢要謹慎啲!」

「激起市民怨氣」
而張堅庭昨在電話中說:「我信財爺買新車唔係早有預謀,不過佢咁做真係冇政治智慧,佢應該企喺巿民立場嚟諗吓,慳呢五萬蚊等於窮等人家成年生活費,財爺可能冇心,但激起巿民怨氣,兩件事好易俾人拉埋嚟講。」
採訪:戴彩煥、比華利
empty
撻定林寶堅尼
資料圖片
empty
買平治慳60萬
資料圖片
empty
賣法拉利