【好長情】少女剪到變美女 關之琳大讚御用髮型師
關之琳
林憶蓮、關之琳(之之)、龐景峰(Andrew)同女友Peggy、上山詩鈉同囡囡Hilary等,今晚喺中環出席好友Kim Robinson嘅髮型屋活動。林憶蓮驚爆引退後首次露面,但今晚佢就禮貌咁婉拒訪問。
之之喺10幾歲起已經係Kim嘅捧場客,咁多年嚟都搵Kim剪髮,佢笑話:「佢最叻幫我剪晒啲頭髮,因為長髮嘅時候冇乜嘢畀佢整,我同佢講唔鍾意長髮嘅時候,佢就幫我剪晒佢,我啲頭髮好快長,1個月會長1吋,佢好快可以幫我轉到髮型,我好放心,用佢嘅產品亦都唔會敏感,我依家乜嘢都要健康,健康最緊要。」問到之之怕唔怕白頭髮?佢笑話:「係人都驚,但甩頭髮仲驚,不過我冇乜壓力,食得、瞓得,冇乜事。」
同場嘅Andrew就被問到好友卓林嘅家事,卓林被指冇錢租賓館,要同老婆Andi一齊返媽咪吳綺莉屋企,Andrew就話太忙冇留意,佢話:「我覺得佢返嚟香港就知道做啲乜嘢,之前佢結咗婚我都有恭喜佢,但係都係覺得19歲會唔會早咗啲,因為我爸爸媽媽咁早生咗我,所以我就知道唔係咁好。」問到佢會唔會經濟支持卓林?佢就話:「呢啲留返畀佢親人幫,如果有需要打電話畀我,我會睇下情況。人生嘅階段會做錯好多嘢,喺17歲至20歲嘅時候,我係錯得最多,o依家佢19歲,我覺得返學係最重要,畢咗業之後為未來鋪路。有啲朋友會問我點解到o依家仲同父母一齊住?係因為我想慳返啲租。」問佢會唔會勸下卓林跟媽咪住?Andrew就話:「每個人都有屋企嘅規矩,佢係我朋友,唔可以有任何嘅意見,香港嘅經濟好困難,交租真係好辛苦。」
另外,Andrew透露嚟緊會拍攝一部內地嘅網絡電影,第一次擔正做男一,今次亦都會同爸爸錢小豪合作,飾演兩師徒,仲係第一次有對手戲,佢話:「聖誕節同新年都會同爸爸過,所以激嬲咗媽咪,因為媽咪係28號生日,不過佢見到我有工作都好開心嘅,自己都諗唔到送乜嘢畀佢,佢就有提議一齊去旅行慶祝。」
精選娛聞,喺晒《娛果》
http://fb.com/appledailyent
之之話會怕白頭髮,但更怕脫髮,不過自己好健康,唔使擔心呢個問題。