研究咗18年嘅觀塘重建計劃終有曙光，市建局下個禮拜二會公開3大模型──「薈萃觀塘」、「躍動觀塘」同「東九觀塘」，行政總監林中麟仲做足公關工作，周一約見傳媒老總，推銷吓佢嘅大計。

3間顧問公司交嘅設計，地積比率7.8至8倍，睇過模型嘅消息人士就話，3個設計都預留足夠休憩同綠化用地，只有4至5座樓高40多層嘅住宅，仲叫蘭西唔使擔心，絕唔會出現一字排開而形成屏風效應！
其中一個較搶眼嘅模型，會有一幢70多層商廈，高過𠵱家喺隔籬嘅創紀之城五期；地積比亦「拉上補下」，即係住宅矮少少，務求唔超標。3個模型住宅分布都差唔多，最大分別係社區中心、廣場同埋交通交滙處嘅位置唔同。之前有人放風，話政府考慮重建區嘅規劃，唔將道路同交通交滙處計入地積比，以減低樓宇密度，但觀乎今次觀塘重建嘅規劃設計，唔跟新措施，都幾難過到城規會嗰關。
林中麟咁重視呢個項目，一定會跟足時間表做，下周二公開模型後，周四正式做公開諮詢，唔知係咪趕住明年3月前向城規會提交申請呢？
電郵地址：[email protected]