孫耀威喺商台接受訪問，老孫話早前拍一齣台灣愛情劇《女王的誕生》，奪得全台收視冠軍，一眾男演員除衫騷肌肉，抱着女主角楊謹華慶祝，老孫話好彩因為有工作要去上海，未能出席祝捷會，老孫話冇操練肌肉，唔想出醜，遲啲都要操番吓。

老孫曾經喺台灣搭的士唔見銀包，楊謹華就同老孫輸賭，如果老孫銀包失而復得，就要老孫搬去台灣住，點知當日的士嘅乘客同司機都好誠實，攞番個銀包去警局，老孫最終守承諾，喺台灣買車買樓長住，不過老孫話唔會移民台灣，會港台兩邊走。