博雅互動（434）最出名就係早年推出咗一款「博雅鬥地主」手機遊戲，玩法同傳統「鋤大D」有啲似，但玩家要分別扮演農民及地主，然後鬥快出完手上的撲克牌為勝，吸引大批玩家日日夜夜「互片」對壘。不過博雅最近「背叛」玩家做地主，皆因公司早前以千五萬買咗尖沙嘴凱譽，實用面積為508呎，呎價都要3萬銀。

冇員工返工　用作收信

點解博雅鬥地主，突然幫襯四叔李兆基，變成博雅做地主？估佢唔到原來係用來做office。博雅本來用一年30萬租緊中港城做香港辦事處，但博雅董事長兼CEO張偉同華華呻，公司所有人都在深圳上班，香港辦事處冇乜實際用途。
之但係香港上市公司都要在本地設辦事處，張偉唔想搵秘書公司，免得同一個地址登記多間公司，畀人有造假之嫌。咁啱中港城寫字樓租約滿，博雅就搵經紀搵office，結果睇中凱譽。明明係搵寫字樓，點解變咗服務式住宅，唔通想做埋員工宿舍？張偉話唔係，只係凱譽單位可商住兩用，做香港商用辦公室無問題。
佢仲話，「每年白付30萬租金，和1,500萬自購物業，那個划算呢？至少保值沒問題吧。」用咁多錢買物業，然後用作做政府登記及收信用途，博雅做地主都幾豪氣！今次買入單位係18樓C室，諧音「實發」，意頭唔錯之餘，又令人想起廣播劇《18樓C座》！

李華華
mailto:[email protected]