仲係農曆七月，民間俗稱鬼節，由初一開始，鬼門關被打開，直到初二十九午夜為止，鬼門關才關閉，多年流傳唔少禁忌，圈中亦有許多靈異事件。真係信不信由你!

今日《蘋果》娛樂直播節目《今日ENT》，搵咗張智霖(Chilam)同阿Sa(蔡卓妍)同大家live chat，分享吓片場嘅靈異事件，佢哋仲參演邱禮濤執導嘅《常在你左右》，肯定有唔少怪事可以同大家講。

阿Sa同Chilam一向好老友，不過佢哋喺電影方面好少合作，今次竟然係第一次合作拍戲，二人2008年喺大陸做巡迴嘅舞台劇，Chilam覺得同阿Sa幾有默契：「大家都係工作認真嘅一群，成件事好順利。」阿Sa話同Chilam本身幾熟：「大家都有共同朋友，變咗有時做嘢都好似玩咁。」Chilam笑笑口咁反駁：「我唔係，我好認真。」

阿Sa即大笑指自己寓工作於娛樂，問到二人合作有咩得意嘢，Chilam諗咗一陣：「我其實係好認真咁玩。」阿Sa解釋大家埋位時就好認真，但係未埋位前，大家好多「水吹」，亦都好多嘢食，日日都有唔同嘅人萬歲。

Chilam稱今次套新片有「龍婆」助陣，有一場戲要同場，事後忍唔住要同龍婆selfie，Chilam笑言：「羅蘭姐，你可唔可以企我哋後面，羅蘭姐好配合，整咗龍婆樣企我哋後面，各人得到一張好靚嘅selfie。」阿Sa讚羅蘭姐真係好勁!

阿Sa直言本身唔太睇鬼片：「因為我驚，不過你拍呢，又唔會驚，因為有好多啲crew喺度，唯一一場真係覺得驚係同羅蘭姐嗰場，羅蘭姐一埋位真係喺度耍劍，喺度撒米，好似隔籬真係有啲嘢咁。」

問佢哋拍攝過程中有冇啲咩奇怪事，Chilam笑言今年最奇怪係拍咗兩套恐怖片(之前同阿嬌拍完《京城81號II》)，阿Sa喺隔籬大笑兼扮鬼：「纏住你!」

Chilam即搞鬼回應：「死都唔肯走，好難得集合到Twins同我一齊工作，係一個好難得嘅經驗。」如果Twins同Chilam再合作，阿Sa就話要拍《古宅心慌慌》下集。

阿Sa話真係冇睇過經典系列《陰陽路》，只係睇過一啲片段，佢直言：「知係好經典，但我本身真係好驚，原先我接呢套戲嗰陣，我都係同導演講，我未必去首映。」Chilam笑阿Sa有好好嘅藉口去偷懶，阿Sa即話：「可以去，但我未必睇，我會驚，因為聽其他幕後工作人員講，呢套戲都真係幾驚。」

Chilam就話自己有睇《陰陽路》，算係fans之一，透露今次《常》個故事係幾有香港鬼故色彩，即係外國嘅鬼故係有個人無啦啦拎把刀出嚟追人，但香港故事就唔同，三個故事都有香港鬼故經典嘅感覺。

場地提供：香港九龍貝爾特酒店

髮型：Vic Kwan @ii Alchemy (張智霖)、Sing [email protected] (蔡卓妍)
化妝：Hetty Kwong (張智霖)、Natalie [email protected] (蔡卓妍)
服裝： Hugo Boss (張智霖)