當年今日

15萬月租賣精品

蘋果日報 2002/01/27 00:00


經紀李果然有料到,一個月前爆料有翻版狗入侵元宵檔口,點知元宵都未到,街邊檔口已經賣緊15蚊隻有交易,搞到潮流特區賣百幾蚊隻正版舖鬼咁頭痕,發晦氣不如齊齊賣翻版。
佢再講單好料:「月餅場生意認真麻麻,唔少舖一日至多做兩三張單,過年後起碼有十間舖執笠。」行過數一數都有六間舖門口貼住頂手廣告,暗盤轉手都唔知有幾多!最誇張好多竟然免頂手費,只希望有人接咗間舖做,唔使毀約賠錢畀業主。「以前環境點差都要收番幾千至幾萬頂手費,填番裝修條數,𠵱家免頂手即係送裝修畀你做生意,咁急甩手可想而知有人蝕到暈。」經紀李又話:「但早排旺角火車站、弼街出口有間舖以15萬租出,租客唔係食肆亦唔係手電舖,只不過係由先達搬嚟嘅精品玩具店,行內都打個突,賣玩具都咁掂?每日起碼要成萬銀生意先夠交數喎。」巿道好難捉,最緊要怪雞就容易跑出,經紀李咁樣總結。

主持人:大食Jack 
八卦熱報:[email protected]