美國「第八屆邁阿密美洲電影節暨金燈塔電影節頒獎典禮」上星期已經舉行，大會特別頒發「中美電影文化特別貢獻獎」俾宮雪花，以表揚佢多年嚟對於影視界嘅藝術文化貢獻，花姨當然盛裝出席。

當日花姨喺頒獎禮上分別以中英文致謝辭，仲話此舉係親身示範中西文化交流，對於今次獲獎，除咗係大會俾佢嘅一份肯定之外，仲話令佢覺得肩負咗作為中美文化使者嘅責任，並將會成為佢嘅推動力，希望未來有更多機會演出好嘅影視作品，繼續為國際演藝文化嘅交流同發展出力。

不過，識睇花姨嘅梗係睇佢啲打扮啦！當日花姨精心度身訂造10幾套靚衫出發，仲喺5日入面換晒嗰10幾套衫聲言要將啲中國文化帶去頒獎禮度，而佢最後揀中咗套「青花瓷皇后古裝」出席頒獎禮，佢話係想藉住套衫，俾外國人領略到中國傳統嘅文化魅力，獲得大會及外國朋友嘅高度評價，花姨仲自讚係艷壓群芳。

花姨嗰個look，係咪似（青花瓷）花樽就見仁見智，但一見到佢，突然聯想起經典喜劇《射鵰英雄傳之東成西就》中，飾演南帝段智興嘅梁家輝嗰個打扮……一樣，係人見到都覺得好開心同會笑出嚟咁囉！

另外，喺嗰個頒獎禮中，靚媽朱茵都有出席，佢同大陸著名男演員劉燁，分別獲得金燈塔獎的影后與影帝榮譽。

精選娛聞，喺晒《娛果》
http://fb.com/appledailyent