建制派昨為官員薪酬及警隊開支護航，工聯會郭偉強不提警隊濫暴，反指工黨張超雄要求削警隊人工屬「攬炒派」，指民主派無資格要求扣減警隊人工。民主黨許智峯發言反駁，郭形容「攬炒派」令港民不聊生，事實上港人在五一黃金周「過得好舒服」，直言若市民覺得民主派差，「咁民主派喺區會點解贏咁多席？」郭聞言即默不作聲離開會議廳。
民建聯陳克勤也為警隊開脫，指不應「一竹篙打一船人」，強調若民主派削減警隊開支修正案通過，「香港真係解散咗警隊，就會變罪犯天堂」，同時，陳亦為曾以「曱甴」形容示威者的消防處長梁偉雄辯解，指「咁就要減佢人工？」
民主黨主席胡志偉指，2003年前港人對中央信心較港府還要高，主因是北京甚少干預香港內部事務，批評中央及港府未有檢討，反不斷批評所謂「黑暴」和「攬炒」，「我同你（政府）講，一日黑警暴力不除，一日中共嘅干預、喺香港建立第二支管治隊伍嘅決心不息，就會攬炒香港！」又批評林鄭對破壞香港「比梁振英更勁」，只識做中聯辦和港澳辦應聲蟲，香港定必喪失兩制下優勢：「港人一定要團結抗命、奮戰到底。」
而提修正案削政府新聞處宣傳開支的人民力量陳志全指，處方不單為當局塗脂抹粉更抹黑他人，如「犯法就是犯法，一定要負責」宣傳片，描繪綁鞋帶、帶傘者參與非法集結。
■記者林俊謙