杜麗莎日前獲徒弟黎瑞恩（小恩子）邀請，進行老師人生嘅首個FB Live Show，短短一日已獲逾15萬點擊。熱愛唱歌嘅杜麗莎眼見網民反應熱烈，愈唱愈興奮，即使唱至凌晨一時亦零疲態。佢用最感性嘅聲音獻唱《真的愛你》、《假如》等經典歌，又數度以紙巾拭淚，獲小恩子大讚「投入度一百分」。

杜麗沙笑言每次唱《真的愛你》都有想喊嘅衝動，問到點解可以咁投入？佢話﹕「我係比較鍾意唱老歌嘅，因為啲舊歌啲詞填得好好，每個字都好似有生命咁。好似呢首歌，我教人唱嗰陣，我都會話，我哋係要through首歌去話俾人聽我好愛你，重點係用心唱。任何嘢只要肯用心做就OK，唔識做唔緊要，有心做同有心學就得，同埋唔好輕易放棄。」

唔少網民都讚杜麗莎唱功無懈可擊，留言﹕「最靚聲FB LIVE」、「聲音很透徹」、「把聲喺呢個年代都唔OUT」，仲有人撐佢喺香港開演唱會。杜麗沙話﹕「THAT’S AMAZING！做歌手最開心嘅，就係見到聽眾真係畀自己嘅感動到。如果有機會，我都好希望喺香港嘅舞台同樂迷見吓面，依家都好難有平台畀人聽到我嘅歌。」

精選娛聞，喺晒《娛果》 http://fb.com/appledailyent