「羅傑承搞卡拉OK？」無錯！佢嘅KTV集團12月1日試業，12月18日正式開幕，一開張就要同中星集團（055）主席薛嘉麟打骰嘅Neway，喺聖誕節黃金檔期埋身肉搏。羅傑承仲爆內情，佢今次搞K場，原來一切由薛家嘅一個拒絕開始。
「百花齊放同惡性競爭其實都係同一樣嘢，只係睇你點講出嚟，總之，個餅好大，我哋唔會割喉，我哋會維持番自己應有嘅利益，唔會惡鬥。」身兼南華足球班主嘅博美投資集團（BMA）主席羅傑承如是說。

薛公子雙倍價購加州紅

作為一個生意人，而且還搞過電影、唱片，羅傑承說，佢一直都有留意卡拉OK呢門生意，亦曾想收購加州紅，家一力搞一個新label，緣起薛公子嘅拒絕：「加州紅舊年年底話唔做，佢哋有啲股東問我，我睇完盤數之後有興趣，只要經營模式唔守舊係有得做，家好多人去卡拉OK，已經唔係為唱歌而唱歌，係一個gathering嘅地方。」
「今年農曆新年前，我畀咗個數出嚟，佢哋只係賣75%畀我。」羅傑承說，呢個時候，賣方亦知會他，仲有另一個潛在買家──中星嘅薛家，「我同薛生好熟，咪打個電話畀佢，話想同佢一齊做，加入我諗到嗰啲新元素。」
不過，羅傑承嘅美意沒有獲得薛生接納，後來，就聽見Neway併購咗加州紅。「我offer近一億頂手，佢畀到我個價嘅double。」羅傑承口中嘅薛生，係已經退下來、讓兒子接棒嘅「大薛生」薛濟傑。

簽四大唱片公司

羅傑承說，接下來，就係加州紅幾百個員工，喺新主上場後，立即被撤走，而呢個頗龐大嘅班子，走來叩佢嘅門，「初時我係冇乜興趣，叫佢哋做盤數畀我睇吓，你知喇，起個新label好貴，到將近暑假proposal完成，盤數okay……舊骨幹戰意高昂，好似打足球咁，唔係全新組班，好有嗰道『火』」，於是搞卡拉OK呢個新計劃，「理性地」立即上馬。
羅傑承透露，下個月先喺銅鑼灣（皇室堡加州紅舊址）及尖沙嘴各開一間，明年暑假時會增到6間，每間K房數目唔會多於50人，每間成本係4000萬。
至於會唔會亦步亦趨，追住對手嚟打，「咪好似百佳同惠康咁囉……以我哋嘅size，係唔可以同Neway比嘅……一定要計數，我哋開到12間嗰陣，個市場已經飽和」。
至於佢嘅KTV有何賣點？「家市場上唔妥嘅會改，我哋要求係100分，最緊要係啲service」。但更大嘅賣點，無論如何也應該係呢句「我哋同『四大』已經簽咗約！」到時可以唱謝安琪、陳奕迅同埋張敬軒嘅新歌。

李華華
mailto:[email protected]