DSE即將喺武肺疫情下開波，考生又要溫書又要預備防疫物資，咪話唔頭痕。民主派區議員為撐考生撈過界，「北區連線」幫區內考生搞咗兩次中文模擬試，有8年補習經驗嘅北區區議會主席羅庭德親自出馬，捱通宵批改過百份Mock卷；另一邊喺九龍東，觀塘區議員李詠珊開放新裝修議辦，畀牛下考生借用，自修溫書又得，約埋同學練小組討論亦得，得咗。

除咗「北區連線」幾位議員幫考生籌備模擬試、派防疫物資，同區另一位素人區議員蔣旻正都準備緊私伙中文DSE練習，佢本身係中文科補習老師，預告嚟緊星期一（23號）、星期二（24號）就會上載練習卷，呢兩個禮拜仲會每晚上載短片，教吓應屆考生中文科應試技巧。各位考生如果想做多啲練習，就留意返蔣旻正Facebook每晚更新啦。

《蘋果》之前已經踢爆，政府派畀考生嘅部份口罩薄到透晒光，K Kwong都話打個乞嚏就穿，所以喺溫書之外，唔少區議員都關心考生夠唔夠防疫物資。「天水連線」就出post呼籲街坊捐出手頭上有多嘅口罩，等佢哋分派畀就讀屯元天中學、有需要嘅應屆考生，街坊可以將口罩交託畀20個屯元天民主派區議員，梗有一個喺左近。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此