張栢芝同謝霆鋒離婚後，惟有復出拍戲努力賺錢，可惜啲戲接連票房仆直，好似上月15號上映但已落畫嘅《危險關係》，喺香港票房只收約11萬，連續六連仆。馮仁昭聽聞目前栢芝冇戲喺手好得閒，唔怪得近日佢咁多時間去九龍塘溜冰同帶啲仔去主題公園玩餐飽，唔知係栢芝陪Lucas同Quintus，定係掉返轉頭啲仔陪栢芝。

被偷拍喝令刪相

噚日有讀者S小姐向本報投訴，話前日喺迪士尼內嘅商店見到栢芝，哇，大明星喎梗係第一時間攞相機影佢相，栢芝見到先係好禮貌以普通話同S小姐講：「不要偷拍，我可以跟你合照。」S小姐以廣東話回答話唔需要。但栢芝一聽到係香港人即時變臉好寸要佢刪除啲相，S小姐話為息事寧人就刪除咗：「但張栢芝話我未delete晒，我話影咗兩張咋，跟住佢好惡話乜嘢強姦兩次咋。」S小姐同行嘅朋友忍唔住話栢芝使唔使咁寸，點知栢芝話：「係咁寸喇。」跟住就施施然行咗去。
係人都知家啲星主力返內地賺人仔，但話晒大家都係香港人，栢芝對內地同胞同香港人完全係兩種態度，唔怪得佢喺香港嘅吸引力大不如前。
撰文：馮仁昭