都唔記得幾多次了，自從韓流天王Rain喺前年公開咗同金泰希嘅戀情後，佢哋已經傳過不下數次婚訊，特別係呢兩年，婚訊傳到言之鑿鑿，又話Rain跟隨女友信教，之後Rain賣大屋、自組新公司，全部都可以聯想到關結婚事，搞到佢哋嘅事務所成日都要出嚟澄清佢哋仲未結婚，都幾頭痕。

好似近日佢哋又第N次傳結婚，話說大前日金泰希就忽然關注咗男友Rain嘅Instagram，隔咗一日Rain都關注返女朋友。其實佢哋都公開咗拖友關係，關注吓男友嘅Ig都好少事，不過佢哋呢個舉動就惹來議論紛紛，事關佢哋拍拖一向好低調，亦都甚少提及對方，突然咁高調關注對方嘅Ig，大家就即時揣測佢哋想將戀情高調，Ig談吓情亦係常識，因而又傳出佢哋好事近，為婚禮做緊準備嘅消息。

講真Rain近日真係幾忙，因為佢會展開巡迴演唱會，當中內地有幾個站，而香港站就傳係明年1月30號喺亞博館，不過消息就仲未公佈，當有傳Rain方面就mark咗個期。

另外，韓劇《大長今》女星李英愛前日去咗首爾明洞UNESCO會館被委任為聯合國教科文組織（UNESCO）韓國委員會特別大使，呢個組織喺向發展中國家進行支援活動，愛姐話：「作為韓國演員同兩個孩子嘅母親，我本人對聯合國教科文組織韓國委員會進行嘅教育支援活動非常關注，深有感觸。現在拍攝SBS電視劇，一人分飾兩角。一邊拍攝，一邊亦都有想韓國傳統教育應點樣介紹畀其他國家嘅想法。我知道韓國委員會現在正進行對非洲、亞洲其他地區困難兒童進行教育支援嘅活動，我覺得呢個會成為一個非常特別嘅緣份，明年會同聯合國教科文組織一起進行更多更有意義嘅活動。」